الدور الدور و جالى التاج و عليا الدور

بعد ما دايما كنت بقول أن ربنا ستار حليم و الحمد لله أن عمرى ما رشحت للتاج و ماشية جنب الحيط أال أيه بناء على ترشيح أخويا المراكبى و تحت التهديد من

(zordeak )

أمتثلت للأمر الواقع و قررت أفصح عن نفسى ماهى أصلها عدوة و أنتشرت فى البلوجات و منين أروح ألاقى فضايح يمين و شمال يلا بأه .....
الأول :
اية اللي حيحصل لايميلك لما تموت؟
أية دة أنتو بتفولوا عليا كمان!!! بعد الشرررررر( مش بجد كان ليا حق مردش)
طبعا حيموت معايا
ممكن أبقى أكتب فى الوصية أن حد من أصحابى يبعت فورورد أخير من الأيمايل لكل الناس الى تعرفنى أنى أنتقلت للرفيق الأعلى بتهيألى حيزعلوا عليا فيمكن يدعولى بالرحمة و المغفرة

.اديت الباس وورد لحد قبل كده؟
لأ لأنى بعشق حاجة أسمها الخصوصية يعنى أحب يبقالى مساحة خاصة بتاعتى لوحدى

.لو اه كانت طبيعة علاقتك بيه
لأ ما قلنا لأ دة اية اللزقة ديه! بس زى ما قلت فى الوصية بأه.
.
اسمك؟
أسمى هبة ولا اهوى التدبير المنزلى

.اسم الدلع المشهور وسط اصحابك؟

لا أحنا متفقناش على كدة! كدة أخدت عليا أوى!.
كل حد من صحابى بيندهلى بأسم مختلف فبحبهم كلهم يعنى زى هوبى و هبهوبة و هوبتى و

hebaz
الى أنا بمضى بيه هنا بحبة علشان مختلف كدة
.
عمرك؟
بأة فى حد يسأل بنت عمرها كام! مش يقول أخدت عليا أوى!
يلا أنا لسة فى الساف سيد
عندى ربع قرن من الزمان :) و نص
على الرغم أنى أشعر أن عندى 100 سنة و أحيانا 15 سنة
( عروستى )
.برجك؟
السرطان
يعنى الرقة ( الأميرة ديانا ) يعنى العزيمة الجبارة ( نيلسون مانديلا )يعنى الفن كلة (شوبان) و (رامبرانت) شفتوا بأة

مجال دراستك؟
شيل الهم بدرى قصدى الهندسة ربنا ميجبلكوش حاجة وحشة

.شخصيتك نوعها ايه؟
يادى الأسئلة العجيبة أكيد الناس هية ألى توصف شخصيتى مش أنا
بس على العموم أنا جد و دوغرى زيادة و دة من أسباب معاناتى فى الحياة و بحب البساطة
على رأى الست الوالدة فاتحاها شئون أجتماعية و شايلة هم الناس كلهاو بحب الناس مووووت
.السفر بالنسبة لك؟
السفر جميل بشوف فية عالم أخر و ناس تانية و ثقافات و طريقة تفكير و أكيد ضافلى حاجات كتير بس أنا بعانى من موضوع ال
Home sickness
بشكل رهيب

المود بتاعك؟
متغير جدا

.وقت فراغك بتعمل فيه ايه؟
أصحابى .قراءة. نت . سينما.

الاكلة المفضلة؟
مش عارفة أيه مزاجى فى حب أى حاجة بتتخن! بس أهو بلم الدور بأة
بس طبعا بموت فى الملوخيه ممممم
و كمان محشى الكرنب من أعز أعز أصدقائى

.الصفات اللي خدتها من بابا؟
أنى متكلمة و أجتماعية و حب الدراسة و القراءةو التفتح فى العقلية و أن القرب من الله و مراعاتة من الأساسيات و الحنية طبعا.الصفات اللي خدتها من ماما؟
الصراحة الزايدة و أنى بيبان عليا كل حاجةوالدمعة القريبة فى الحزن و الفرح(دايما بقول أعز النكد زى عنية ) و أكيد الحنان و حب الفنون و الرسم
.اكتر 6 حاجات بتكرهها؟
الظلم
الخبث و اللؤم
اللف و الدوران و النفاق
الأنانية و القسوة
.اكتر 6 حاجات بتحبها؟
القراءة
الصدق و الصراحة
الضحك من القلب
لما أحس أن ربنا راضى عنى
النقاشات الى فيها تشغيل دماغ

الشغل بالنسة لك؟
إثبات ذات و إستقلالية و أحلى إحساس لما بحس أنى مفيدة و بعمل عمل مفيد و له لازمة و حيعمل فارق يا سلام بأة لو كمان حيفيد ناس تانية
ايه الكمبيوتر والانترنت بالنسبة لك؟
ممكن نقول إدمان
نافذة على العالم
كمان انا شغلى معتمد 90% على الكومبيوتر فيا أهلا بأمراض الظهر و العظام و العيون

الثانى:

الخمس حاجات اللي ماحدش يعرفها عنى هى:

حتفضل محدش يعرفها هىهى محدش لية دعوة بأة كفاية فضايح لحد كدة و منجيلكوش فى حاجة وحشة :)